政情:林生林太孖住吐苦水

政務司司長林鄭月娥同行政會議召集人兼平等機會委員會主席林煥光(WK),兩位林生、林太由港英政府年代做到特區政府,服務超過三十年,一個被喻為「好打得」、頻頻為局長拆彈嘅官場保母,一個喺平機會嘅工作亦備受好評。不過,兩人尋日出席電台節目時就不約而同緬懷過去兼大吐苦水,林鄭話以前個「廚房」唔熱又唔凍,WK就批評立法會議員講埋啲無謂嘢,聽到啲官員瞌晒眼瞓。

林鄭同WK尋日出席政壇新秀活動時相認,原來林鄭早喺七十年代加入政府,半年後嘅上司正正就係WK,林鄭坦言,當年政府絕對唔係熱廚房,而且仲好溫暖,WK唔單止好照顧佢呢個新人,放工仲會一齊出去打波飲嘢,非常享受咁話,更從來冇諗過劈炮唔撈添!不過,今時唔同往日,依家政府呢個廚房熱到火爐咁,立法會議員郁啲就「拉布」,班局長「囝囝」又唔聽話,日日掛住湊仔邊有閒情飲嘢先得o架!

WK為進修 唔做銀行大班

WK亦透露,當年大學畢業後,差啲就入咗恒生銀行做見習生,但成世仔淨係去過廣州嘅佢,眼見政務官有機會去英國牛津大學進修,所以最終決定棄商從政做政務官(AO)。佢回憶當年啱啱入行要帶隊拆寮屋,班村民見到長髮造型嘅佢,即時嫌佢未夠班,大鬧:「搵個死飛仔嚟,叫個大啲嘅出嚟!」不過,WK唔單止冇嚇親,仲覺得好好玩!面對依家部分市民郁啲就掟嘢、扑頭,唔知WK有得再揀嘅話,會唔會寧願做銀行大班呢?

活動上有年輕人為官員發明幾項法寶,但兩人就對可以吸走睡意嘅「吸取睡意機」最有興趣。WK話,佢為官多年,最驚出席立法會會議,佢批評議員發言九成都係講無謂嘢,講來講去都係三幅被,有咗呢部機就可以幫自己吸走睡意喇!如果部機真係有得賣,相信班建制派議員一定會搞團購,因為用嚟對抗「拉布」就啱晒!其餘法寶仲有幫特首梁振英(CY)表決議案嘅「立法會職務機」,咁CY以後就唔使怕議員「拉布」,想幾時表決通過議案,撳個掣就辦妥啦!

第一手消息請下載on.cc東方互動iPhone/iPad/Android/Windows Phone Apps