中環出更：葉澍堃娶新抱心急抱孫
近兩個幾月嫁娶喜事特別多，尋日輪到前高官葉澍堃（Stephen）家有喜事，葉家大公子葉瀚林（Hiram）與拍拖逾十年嘅女友Connie，假香港聖約翰座堂註冊結婚，近三百名親友齊見證甜蜜時刻。首次升格做老爺嘅Stephen同太太Nancy全程笑到見牙唔見眼，猛讚新抱能幹細心，又催促一對新人快啲造人，恨抱孫恨到出晒面。
尋日Hiram同Connie只係註冊結婚，到本月十五日先至喺中環四季酒店擺酒請客。Stephen笑言好開心，因為首次娶新抱，但受到擺酒場地所限，可能請唔晒城中好友，要事先講聲唔好意思喎。Stephen對新抱讚不絕口，話囝囝比較粗心，新抱就好細心，加埋兩人都喺銀行任職，所以好夾，榮升奶奶嘅Nancy就畀新抱滿分。至於抱孫，兩人不約而同話愈快愈好。
玫瑰花瓣砌「Marry Me」
到場觀禮嘅親友坐滿教堂，立法會議員石禮謙同女友Lisa都有到賀，儀式完後就舉行酒會派對。卓妮問新娘子Connie，老公用乜嘢冧招求婚？佢話早前兩人去法國旅行慶祝拍拖十周年時，期間Hiram細心安排坐南瓜花車巡遊巴黎，又享用浪漫燭光晚餐，但最驚喜係，當夜晚返到酒店，一入門口就見到床上用各種顏色嘅玫瑰花瓣砌成「Marry Me」，Connie感動到喊晒出嚟，即時話：「我願意！」
卓妮