多謝支持！多謝捧場！萬眾期待嘅《好報》尋日強勢登場，市民反應熱烈，讀者讚不絕口，廣告商好評如潮，可喜可賀！
功夫茶唔係賣花讚花香o架，《好報》受歡迎程度超乎想像，點只一個「好」字咁簡單。隨《太陽報》附送嘅《好報》搶手唔在講，朝早七點半左右喺全港逾百個地點免費派發，更加係場面墟冚，有啲派發點十幾分鐘就派晒，有讀者擔心落空，竟然心急到抓傷派報員嘅手，講起都肉緊。
聽吓讀者點講吖嘞。有人讚《好報》以娛樂新聞為主，好好睇；又有名人揭秘，真係好精彩。有人就話《好報》紙質好，娛樂新聞做頭版好特別，副刊文章既淺白又有趣。嗱，呢啲咪叫口碑囉，好人有好報，好嘢自然有人欣賞。
《好報》好搶手，廣告周圍走，功夫茶不得不讚廣告商一句：好眼光！冇錯嘞，《好報》內容豐富，猛料如雲，一登場即大受歡迎，何只讀者有好報，廣告商更加好上加好啦。睇吓其他免費報，唔係譁眾取寵，就係誨淫誨盜，完全冇料到，即派即棄即被回收，最大嘅貢獻就係畀公公婆婆當廢紙賣，換番個平價早餐。唔怕唔識貨，最怕貨比貨，畀着你係廣告商，你都識揀啦。
始終都係呢句，善有善報，惡有惡報。《好報》秉承東方報業集團嘅宗旨，弘揚正義，懲惡揚善，好人固然有好報，而壞人就有得震冇得瞓喇。大家都知，《好報》嘅最大特色就係追蹤追擊名人明星，深入發掘內幕秘聞，所以咯喎，如果有人做咗虧心事，實走唔甩o架。
不過咁，如果名人明星同《好報》合作，大家好來好去，咪可以相安無事咯；相反，如果有見不得光嘅秘密仲要遮遮掩掩，閃閃避避，咁就唔衰攞嚟衰喇，《好報》一定會窮追猛打，大爆特爆o架。相信大家都見識過東方報業點樣獨家踢爆曾蔭權爵士嘅連串貪腐醜聞，講到爆料，《好報》絕對不會客氣，牛鬼蛇神從此無所遁形。總而言之，「合作有好報，閃避冇面畀」，「肯合作就有好報，唔合作就現眼報」，好自為之吖！
講開又講，香港家陣妖孽為患，烏煙瘴氣，確實需要一股正能量來激濁揚清，撥亂反正，《好報》應運而生，絕對可以為社會帶來一種新氣象。所以話，《好報》一推出就得到讀者熱烈捧場，係好正常嘅反應。計功夫茶話齋，好嘅開始就係成功嘅一半，有東方報業集團作為後盾，《好報》一定會再接再厲，精益求精，做到好上加好。記住吖，好人有好報，星期五請早！