久未露面嘅前立法會資訊科技界議員譚偉豪（Samson），尋日就喺社交網站上載一幅全家福，入面除咗包括Samson太太同佢哋讀緊中六嘅囝囝外，仲有一個着住大學畢業袍、手持兩束鮮花嘅靚女，唔通Samson仲有個女收埋咗？Samson聽到呢個講法後大笑咗幾聲，解釋個靚女查實係佢大家姐個女，即係佢嘅姨甥女。佢話就讀科技大學專業會計學嘅姨甥女喺上月中畢業，身為舅父嘅佢當然要出席畢業禮見證重要時刻啦，所以先至會引發呢個美麗嘅誤會。
自從冇做議員後，Samson話樂得清閒，晏晝喺屋企處理科技投資業務，夜晚就會幫就嚟考高級文憑試嘅囝囝補習。雖然現時離考試仲有五個幾月，但由於囝囝心儀港大建築系，所以佢要開始幫囝囝溫吓啲物理同數學。不過，佢大讚囝囝遺傳咗佢啲優良因子，好多嘢一點就明，唔使佢講到口水都乾埋。立法會依家日日拉布拉到天昏地暗，Samson感嘆以前成日開會，根本無時間陪老婆同囝囝，依家反而可以日日幫囝囝補習，仲多咗時間同屋企人共享天倫之樂。