政情：副局人選 揀唔落手
特首梁振英政府上任近五個月風波爭議不絕，各問責官員疲於奔命「拆彈」，自然有殷切想搵副手幫手，但有個別局長搵了又搵仍未揀啱心水副手，講緊嘅係勞工及福利局局長張建宗（小肥張）同商務及經濟發展局（商經局）局長蘇錦樑（Greg蘇）。據聞佢哋都求才若渴，奈何因種種原因要繼續將副局長一職「冰封」，面對立法會各黨派排山倒海嘅攻勢，睇怕小肥張同Greg蘇要繼續獨力支撐多一段時間喇。
港府短時間內就會公布新一批副局長同政治助理名單，尋日就再公布食物及衞生局聘任多一名政助，但未有副局長嘅勞福局同商經局依然未有着落。
消息指，小肥張同Greg蘇都想搵個好幫手，好似小肥張最近就飽受長者生活津貼「拉布戰」之苦，變相長期被「幽禁」於立法會，想分心處理其他勞福政策都好難。至於Greg蘇方面，佢負責嘅商經局出名多外訪，最近免費電視發牌爭議亦搞到一頭煙，如果有副局分擔工作，確係求之不得。
究竟小肥張同Greg蘇何解搵唔到「左右手」呢？據聞呢兩個政策局都不乏有心人想加入，但有知情人士形容，原本勞福局係最有望首批搵到副局長，因為最少有幾個人選，然而被視為人選嘅前梁振英競選辦副主任何永謙，有傳公務員內部對佢有意見，至於盛傳履歷條件叮噹馬頭嘅工聯會鄺志堅同社聯蔡海偉，政府就擔心選擇鄺志堅會得罪其他工會，後者則疑似自行縮沙，結果雙雙名落孫山。
「拍拖更」仲要等多一陣
至於商經局同樣面對類似情況，據聞Greg蘇私下表示想搵個副局長要有增值性，換言之可以同佢互補不足，但申請者唔係條件稍遜，就係欠缺政治歷練不能即時「上手」，所以聞說Greg蘇已經退而求其次搵咗個政助頂住先，但礙於聘請程序需時，故暫時尚未可以對外公布。究竟小肥張同Greg蘇幾時先可以同副手「拍拖更」現身，睇嚟仲要多一段時間，兩人只好自求多福喇。