中環出更：葉振南奉旨歎滿漢全席
曾經喺香港叱咤一時嘅「滿漢全席」宴，絕迹逾三十年後，近日再度現身香江。中華廚藝學院早前就擺咗十圍「滿漢全席」籌款，城中善心名人齊捧場，每席盛惠十五萬元，愛嘗美食嘅汕頭商會常務副會長葉振南（Stephen）都應飲食集團老闆邀請，奉旨擦餐勁。
正斗菜式 款款講究
滿漢全席之所以咁巴閉，皆因食材全係奇珍異獸，熊掌、猴腦、象鼻、豹胎、猩唇等，時至今日，真係聽見都驚，但今次晚宴絕對係改良版，喺原有一百零八道菜餚中，選出十五道正斗菜式。當中包括「九如獻瑞」，即以含豐富骨膠原嘅山瑞，加入羊肉、魚肉，夠晒鮮味；「踏雪鱘龍」就以菊花炒鱘龍球，爽口彈牙；仲有「崑崙網鮑」等。
Stephen最欣賞係連甜點都好講究，四式甜品全係宮廷小吃，包括牡丹酥、芝麻棗、山楂卷及豌豆黃，配以雕花嘅精緻錦盒，食到賓客舔舔脷。入座前，大會安排貴賓換上金黃色「龍袍」及「太后服」影張相。件袍一笠就掂，連西裝都唔使除，Stephen都擺個Chok樣影相留念。