中環出更：中總就職禮變人大拉票站
香港中華總商會尋晚喺灣仔會展舉行新一屆就職晚宴，共筵開一百三十八席，場面非常壯觀，唔少政商界猛人都畀面到場祝賀中總新班子。中總新任會長楊釗話，希望任內可以弘揚中華文化，明年其中一項重點係舉辦學生交流團，希望香港學生增加對祖國嘅了解。不過，如果尋晚有學生在場嘅話，一定對認識祖國有幫助，事關晚宴幾近變成港區人大代表參選人嘅拉票場地。
尋晚每位到場嘉賓都係重量級，幾大商會都派代表出席，包括中華廠商聯合會會長施榮懷、香港總商會立法會代表林健鋒、工業總會主席鍾志平等，仲有各界社團代表；而政府方面就有政務司司長林鄭月娥出席。
抽獎禮物份份重磅
中總見到咁多人畀面到賀，安排嘅抽獎亦非小兒科，頭獎係價值三萬元嘅紀念金幣，就連市面最新款嘅智能手機都有，估唔到中總都係走在潮流尖端。
各人大參選人尋晚都好高興，事關中總製造咗一個場合畀佢哋滿場飛拉票，有人帶埋幾個助手去派卡片，完全無放棄任何一個拉票機會。其中代表新界社團聯會參選嘅陳勇話，上屆人大選舉黃宜弘都係爭幾票落敗，所以吸收經驗後決定要每日打足一百個電話拉票，總之一票都不能少喎。
卓妮