今日睇咗未吖？好料猛料勁料多到爆燈嘅《好報》今日強勢登場，除咗隨《太陽報》附送，仲喺港九新界各區免費派發，派發地點多達百幾個，手快有，手慢冇，千祈咪走寶吖！
東方出品，必屬佳品，《好報》係東方報業集團最新傑作，質素有保證不在話下，最重要係秉承東方報業為民喉舌嘅宗旨，伸張正義，揭露醜惡，又點止免費報咁簡單。呢，政商名人追蹤追訪、藝人明星內幕秘聞、消閒娛樂美酒佳餚、全球各地奇聞趣事，《好報》包羅萬有，豐富多彩，係名副其實嘅好猛料、好熱鬧、好八卦、好鬼盞、好鬼索嘅消閒娛樂資訊大全。如果話其他免費報係淡而無味嘅水喉水，咁《好報》明顯就係一杯令人回味無窮嘅香濃咖啡，值得大家細細品味，慢慢享受。
係人都知，壹淫媒當年引入所謂狗仔隊跟蹤採訪，不擇手段，罔顧道德，唔止破壞傳媒生態，更污染社會風氣，市民對呢種扒糞式劣質狗仔文化深惡痛絕。正義傳媒撥亂反正，隆重推出《好報》，以其人之道還治其人之身，賦予狗仔文化全新定義，能人所不能，爆人所不爆，好話唔好聽，絕對比狗仔文化更快更猛更勁更狠，一定可以為讀者帶來新感受，為社會帶來正能量。
講到正能量，有人可能唔知係乜嘢，其實正能量好簡單，就係好人有好報，惡人有惡報咁解。《好報》好就好在有料必爆，爆料必堅，唔會無中生有，亦唔會遮遮掩掩，更加唔會學嗰啲鹹濕免費小報咁作古仔呃讀者。相信大家一定見識過，東方報業集團點樣窮追猛打，獨家踢爆曾蔭權爵士「貪遍省港澳，歎盡海陸空」嘅連串醜聞，令貪官身敗名裂，維護咗香港核心價值，簡直大快人心。嗱，呢啲咪就係正能量嘅威力囉。
話時話，香港家陣黑白顛倒，妖孽為患，烏煙瘴氣，七國咁亂，港人對無日無之嘅政治爭拗早已厭倦，《好報》橫空出世，懲惡揚善，就好似一股清流咁，必定可以令人耳目一新。正如有人話齋，睇《太陽》得《好報》，揭內幕有料到，以後高官出席乜嘢社團飯局呀、坐私人遊艇及飛機呀、豪花公帑周遊列國呀等等，都唔敢咁明目張膽喇；仲有吖，嗰啲反中亂港嘅洋奴漢奸都唔敢咁肆無忌憚喇。總而言之，有正義傳媒，牛鬼蛇神就無所遁形，相信讀者對「正義狗仔隊」一定充滿信心，對《好報》一定充滿期待。
功夫茶始終認為，有麝自然香，有《好報》就有正氣，睇《好報》必有好報。嗱，約定大家喇，逢星期五見！