公民講場：區載佳查僭建難為了家嫂

雖然話僭建喺香港比比皆是，不過踢爆僭建喺近年已成為對政治人物嘅「攻擊性武器」，搞到處理僭建嘅部門、即係屋宇署疲於奔命。屋宇署除咗調查僭建應接不暇，仲要成為磨心同埋政治工具。喺特首梁振英嘅大宅僭建事件上，有人話屋宇署包庇特首，又話前線因高層壓力停止調查。屋宇署署長區載佳尋日終於同幾個同事一齊見記者，話該署執法不偏不倚，唔會因為業主身份而特別寬鬆處理，包庇嘅講法，對屋宇署同事不公平。佢講到眼都紅晒，好委屈咁款，喺夾縫裏做人，真係難為了家嫂。