政情：上任8日即申報 莫宜端身家清白
做得政治任命官員，就預咗要畀公眾拎放大鏡去審視一舉一動，不過呢個對曾做過傳媒人嘅勞工及福利局政治助理莫宜端（Zandra，圖）毫無難度，佢喺上任後短短八日就向當局遞交咗申報表，事關佢認真身家清白，要申報嘅事項五隻手指數得晒，當中最值錢嘅係九龍又一村自住物業，難怪Zandra可以快人一步交申報。
首披露配偶資料
誠信同透明度高係政治任命官員嘅生命，曾喺○八年同勞工及福利局局長張建宗合作無間嘅Zandra相信對此別有感受，重返政府後不忘喺短時間內遞交個人申報並提供公眾查閱。
咪睇呢份申報好似要填嘅欄目唔多，查實細心翻閱時可能有意外收穫，好似Zandra呢份申報首次披露Zandra嘅另一半叫做郭耿華，本身做緊助理技術顧問，二人共同擁有九龍又一村一自住物業嘅業權。除此以外，Zandra僅申報自己係「三十會」成員。話時話，相比起Zandra嘅身家清白，唔知其他剛上任嘅政治委任官員，會否盡快釐清自身各項利益後，就盡快向當局提交申報呢？