政情：自爆天生「明星相」慢必被認錯過世鍾保羅
人民力量立法會議員陳志全（慢必）尋日喺社交網站自爆，晏晝喺中環一間茶餐廳食飯時，有個坐佢附近嘅師奶突然走上前，當佢以為對方諗住問佢對政府施政嘅睇法時，嗰個師奶竟然問佢係唔係電台節目主持葉文輝（啤梨），搞到佢即時「○晒嘴」，惟有面懵懵咁講句「其實我唔係」，將個師奶迅速打發走。
慢必話，成件事除咗令佢覺得啼笑皆非外，仲令佢諗起自己成日畀人認錯做明星或者電台主持。佢憶述舊年搭小巴時，兩個阿太不斷喺佢隔籬竊竊私語，其中一個師奶之後就擰轉頭問佢係唔係創作歌手林一峰，佢梗係即時否認喇。
佢話最經典一定係幾年前，佢喺金鐘一間酒店畀清潔嬸嬸認錯佢係電台唱片騎師鍾保羅。鍾保羅喺八十年代紅極一時，係當時年輕人嘅偶像之一，不過佢已經喺八九年跳樓自殺身亡。當時聽到清潔嬸嬸咁講，慢必話令佢當堂嚇咗一跳。
總結幾次被「點錯相」疑雲，慢必話畀人當係明星嘅次數唔算太多，「咁都唔算好衰，起碼佢哋都算幾靚仔」。不過歸根究柢，慢必話成日畀人認錯可能係自己嘅形象未夠突出，所以未來要積極諗計提升知名度。