特首梁振英政府上場後先後多次將香港同新加坡相提並論，無非想提醒港人要有憂患意識，正所謂講多無謂做就最實際，新界青年聯會即時坐言起行，到新加坡一趟睇吓當地嘅最新發展，即使要自費前往都一呼百應，認真有團隊精神。
新界青聯主要負責人今日起一連多日到新加坡實地了解當地嘅房屋及青年政策，叫得考察自然唔可以「柴娃娃」，據聞新界青聯事前將舉行一系列講座，邀請專家學者講解新加坡最新發展情況，其中身兼新界青聯主席嘅立法會議員陳恒鑌為咗做好榜樣，之前買咗四本同新加坡政經有關嘅書籍，又着手刨緊前新加坡總理李光耀嘅回憶錄，做定事前準備工夫。做好功課之後至起行，一切都會易吸收好多喎。
同樣有份到當地考察嘅北區區議員劉國勳話，佢哋聯絡定香港駐新加坡經濟貿易辦事處代表、新加坡前教育部長等人會面交流，佢期望此行可以睇吓新加坡有咩地方值得借鏡，並且睇吓香港有咩優勢值得繼續強化喎。梁振英成日都話好想知道青年對香港未來有乜睇法，佢哋去考察後，或者有好多靈感可以畀特首呢。