政情：三區會爭奪啟德
新政府致力拓展土地興建公營房屋，早前甚至覬覦興建啟德體育城嘅用地，惹來非議，搞到要港府高層高調開腔平息爭議，據聞呢場戰線擴大並蔓延至區議會層面，九龍城、黃大仙同觀塘三個區議會因政治利益考慮，正各自發功爭取啟德發展區落戶當區，加上啟德發展區嘅學校網劃界情歸何處，亦觸發一批望子成龍嘅家長神經，點樣先擺平到各個持份者嘅期望，認真係考驗新政府嘅政治智慧。
前身係啟德機場嘅啟德發展區，地圖上大部分劃分予九龍城區，惟自啟德機場搬遷後，一直有待發展嘅啟德發展區陸續明確發展方向，既有商住同休閒保育用途，亦有郵輪碼頭同啟德體育城等其他用途，惹來九龍城、黃大仙同觀塘三個區會嘅注視目光。
有地區消息指，三個區會都對啟德發展區撥入佢哋所屬範圍有不同程度嘅期望，最主要原因係該區現兜兜有望新增至少兩個區議會議席。九龍城區會認為啟德機場原先已屬九龍城範圍，啟德發展區順理成章應順利過渡；黃大仙區會方面，據聞最大力支持保育規劃嘅工聯會力主不以「豆腐鎅豆腐」方式處理規劃問題，工聯會有意染指新增嘅區議會議席，繼續壯大佢哋喺黃大仙嘅實力，不言而喻。至於觀塘區議會，多名區議員睇準當局大鑼大鼓做「起動九龍東」計劃，入面都包括啟德發展區嘅海濱地帶等項目，而九龍城本屬九龍西，改呢個名或多或少反映部分政府部門嘅取向，甚至有人解讀為落戶當區嘅好兆頭。
教育界亦表關注
除咗三個區會大鬥法外，據聞連教育界亦開始關注呢個區域分界問題，事關呢個將會影響學校網嘅劃界，以至家長最關心嘅小一學額分配問題。究竟啟德發展區會情歸何處，即不變應萬變繼續屬於九龍城區會範圍，定係要重新規劃甚至「斬件」給兩或三個區會瓜分，相信港府要有一個完整思路，先可以說服各持份者喇！