中環出更：港區人大報名好墟冚
第十二屆港區人大代表選舉提名期下月四日結束，而尋日喺上環信德中心嘅報名處就認真墟冚，有超過十位參選今屆港區人大選舉嘅人士分別喺唔同時間報名。雖然攞到選舉委員會成員嘅十個提名就可以參選，但參選人都要鬥多攞提名，人人樂此不疲。
好擔心自己淪為中聯辦劉江華嘅中聯辦社會工作部部長張鐵夫攞住二百二十幾個提名去報名，工聯會榮譽會長鄭耀棠同理事長吳秋北分別攞到嘅提名仲多，兩人都攞到超過二百五十個提名，成為當日「提名票王」。至於角逐連任港區人大嘅蔡素玉亦攞到二百二十五個提名，不過本身祖籍福建嘅佢話，今日先去拜會同屬福建嘅選委，再陸續爭取各界支持，所以相信最後有機會攞到近三百張提名票。
陳智思無諗選特首
尋日現身嘅仲有行政會議成員陳智思（Bernard），有傳聞話佢今屆會棄選，準備五年後選特首，Bernard就話呢個講法超越佢想像，而且選特首唔喺佢計劃之內，其實考慮咁耐至決定報名選人大，係擔心人大同行會角色有衝突，不過諗到中港融合涉及咁多議題，相信做人大會對行會有幫助，佢至決定參選。而Bernard本身已係全國人大，想博連任。
角逐連任嘅仲有香港科技大學副校長黃玉山、基本法研究中心副主席馬豪輝同前紡織及製衣界立法會議員劉柔芬，佢哋以「三劍俠」姿態報名。首次參選嘅「愛國歌手」張明敏就話，拉票時一定唔會用唱歌呢個方式，因為咁對其他參選人唔公平喎。尋日報名嘅仲有前廠商會會長黃友嘉，同身兼香港工商總會會長嘅南旋集團主席王庭聰等。
卓妮