政情：自由黨人才凋零焗周梁做主席
沉寂多年嘅自由黨，成功喺今屆立法會選舉「翻生」，一躍成為手握五席嘅關鍵政黨，不過都唔能夠掩蓋該黨人才凋零嘅事實。點解咁講？醜婦終須見家翁，政府黨終要選主席，自由黨終於都要焗早已揚言話要湊孫淡出嘅副主席周梁淑怡（莎姐）做主席。立法會同區議會議員都支持佢，睇嚟佢眾望所歸，無得唔做。
該黨上星期決定用雙頭馬車嘅方法，搵咗田北俊同劉健儀雙雙擔任自由黨嘅榮譽主席，而主席一職仍然係由方剛暫代，未有人願意出嚟擔大旗。不過我哋聽聞，自由黨五位立法會議員都決定提名周梁淑怡做主席。原來要一登自由黨主席呢個位，門檻高過選特首，至少要有四分一嘅黨立法會議員提名至得，由於現時自由黨有五位議員，四捨五入下即係最少要兩位議員提名至得，除咗咁之外，仲要一成黨員和議，咁至有資格角逐黨主席一職。
我哋聽聞最新嘅消息係五名立法會議員全數決定提名莎姐做主席，換言之即係只要莎姐肯做，再搵多一成黨員支持自己就得。我哋問過自由黨老中青三代黨員，個個都話莎姐係合適人選，資深黨員大讚佢有豐富政商界人脈，後生嘅一批就覺得莎姐有威嚴，可以壓得住個場。個個立法會議員都聲稱有自己嘅難處，都唔願做主席，造成莎姐個勢咁勁，睇嚟佢都好難走得甩。
莎姐：一切等黨中委通過
莎姐○八年喺新界西選立法會落敗後，其實都已經疊埋心水諗住淡出，四個乖孫搞到佢暈晒大浪，從政多年嘅佢退出「江湖」反而一身輕鬆，所以佢從不心郁部署重返立法會，不過到咗呢一刻，佢都義不容辭好難再推。對於黨友抬佢「上轎」，莎姐尋日嘅回覆，係時間仲早，一切都要等黨嘅中委通過。結果係點，下月就會揭盅。
主席一職近乎敲定，而副主席亦打算由兩個加至三個，究竟邊個會做副主席，暫時仲未知，但張宇人就講明自己無意擔任副主席喇，手上份提名表格早已授權畀田北俊處理，總之邊個做都會支持喎。