棟篤笑金句有云，若要人不知，唔好咁低B。仲有一句就係話，有早知，冇BB。
最近有一個古仔諗落真係令人啼笑皆非，有一個警察喎，唔知係江湖救急定係欠債還錢，竟然化身為一個的士司機，秘撈搵銀去也。瞞住警隊違例兼職都算嘞，呢一個警察司機仲要係無良嗰隻，出蠱惑欺騙乘客濫收車資，即係俗稱嘅黑的士。為咗杜絕猖狂劏客嘅黑的士，警方派出臥底神探便服出更，放蛇假扮乘客由尖沙咀廣東道搭去赤鱲角機場。
好嘞，警察司機載住警察乘客去到機場之後，警察司機一開口就話車費四百五十元，比起正常收費多出一倍。警察乘客馬上表露身份，情節簡直就好似電影《無間道》咁樣，呢個話「我係警察」，嗰個又話「我都係警察」。
咁冇辦法啦，捉賊拿贓斷到正，秘撈警察淪為無良司機係鐵一般嘅事實，臥底神探以四項罪名將佢拘捕歸案，包括涉嫌濫收車資、未有展示的士計程錶指示器、未有將的士計程錶撥到開始記錄以及未有展示的士司機證。簡單咁講，秘撈司機一次過淪為兩種敗類，首先係警察敗類，其次係的士敗類。
呢個古仔好笑得嚟又好可悲，喂，堂堂男子漢大丈夫，執法者點解會變成犯法者o架？正所謂小時偷針大時偷金，家陣就話揸的士呃乘客啫，萬一變本加厲揸支槍打劫銀行點算好呢？大家相信記憶猶新啦，警魔徐步高真係揸支槍去打劫喎，仲要狼死到開槍殺死銀行護衞。警員梁成恩被槍殺亦係徐步高所為，所以警察一旦淪為敗類真係好鬼死得人驚o架！
警察敗類固然有必要掃除，其實的士敗類同樣有必要肅清。黑的士黨入侵遊客區嘅情況愈來愈嚴重，交通諮詢委員會轄下交通投訴組數字顯示，關於無良的士司機濫收車資嘅投訴持續增加，今年首季投訴數字多達三百五十宗，較去年同期急增兩成三。更加離譜嘅係賊的士強搶乘客行李，今年頭十個月有十九宗的士盜竊案，五名的士司機被捕，當中兩人被檢控，分別判監五個月以及社會服務令。
所以話啫，臥底神探真係要頻頻出動，即使唔係差人捉差人咁戲劇性，起碼要打擊無良的士司機吖嘛，事關旅遊業已經係香港不可或缺嘅一碌經濟支柱，唔可以容許的士敗類令香港蒙羞，萬一外國遊客望而卻步，邊個孭得起咁大隻鑊呀？
至於嗰一個秘撈劏客嘅警察司機，自己前途盡毀冇人可憐，怕只怕佗累警隊形象低落。你知啦，羅馬非一日建成，形象呢家嘢摧毀容易建立難，千祈唔好再養出另一個徐步高呀！