政情：揭放長假之謎 李國章陪太太美國醫病
行政會議成員林奮強因為「賣樓風波」已無限期休假，原來行會內仲有另一位休假好耐嘅成員，就係前教統局局長李國章喇，但佢並唔係偷懶唔開會，而係要陪愛妻到美國醫病。聽聞李國章自從八月份開始就無再開行會，一直喺美國陪伴住太太治療，默默為太太加油，直到前日喺人大選舉會議上至現身。
我哋喺唔同渠道都聽聞，李國章自從八月份開始，已經絕迹行會會議，而且甚少喺香港出現公開場合，連數碼廣播（dbc）早前嘅股東紛爭，身為股東嘅李國章都無參與，全程委託另一股東黃楚標處理。原來佢位外籍太太最近舊病復發，愛妻情切嘅李國章為咗多啲時間陪太太，已經飛咗去美國打點一切。
其實○二年時已經出現過類似情況，當年李國章出任教統局局長後，年底已經放低晒所有工作，向時任特首請辭，原因都係陪太太到美國醫病，但後來獲特首成功挽留。開行會當然重要，但無嘢重要得過親人，所以我哋祝願李太盡快康復，繼續同老公恩恩愛愛啦！