政情：《南早》又擺烏龍 梁家傑錯當梁愛詩
本港英文報章《南華早報》又再「擺烏龍」，繼前年誤將國家主席「胡錦濤」個中文名寫錯成維權人士「胡佳」，去年五月報道拉登死訊時，又將Osama（拉登）個名寫錯做「Obama」（美國總統奧巴馬），生勾勾無端端話人哋死咗。點知該報尋日又再「張冠李戴」，將公民黨黨魁梁家傑批評港澳辦副主任張曉明署名文章部分觀點，夾硬套落基本法委員會副主任梁愛詩把口，仲出埋詩姐張相添！
《南華早報》尋日A1頭版報道，張曉明撰文指香港應該適時完成《基本法》二十三條立法，又堅稱人大常委會有解釋《基本法》嘅權力，梁家傑反駁指張曉明嘅文章不只違憲且不道德。不過，最令人難以置信嘅係，該報竟然喺頭版放上詩姐嘅圖片，並將梁家傑嘅批評當成詩姐嘅言論。稍有常識嘅都知道，以詩姐嘅身份冇乜可能同張曉明公然「打對台」，所以該報今次一如過往，都係錯得認真離譜。
三年內第三次出大錯
事實上，《南華早報》首先將本身係男人嘅梁家傑變成女人，其次將詩姐言論「泛民主派化」，唔知情嘅人仲驚訝點解詩姐會批評港澳辦官員。另外值得留意嘅係，今次已經係《南華早報》近三年內第三次搞錯咗啲重要資料，還記得有次該報歸咎有外國員工唔識睇中文所以出錯，雖然唔知今次又會用乜理由去解釋，但至少該報應該要還詩姐一個清白囉。