因應柴灣道長命斜大車禍早前不幸造成三死數十人受傷，身兼交通事務委員會副主席嘅Gary不敢怠慢，隨即去信委員會主席陳鑑林，要求盡快召開特別會議問個究竟，點知一執筆寫信就「露晒底」，寫錯字兼詞不達意。Gary接受查詢時辯稱，呢封信係由同事撰寫，又承諾以後會睇多幾次，小心覆核吓有冇錯字先喎。
議會新丁連環出醜
話時話，新一屆議會新丁讀寫鬧出笑話已非首次，最廣為人知嘅係「雙料議員」鍾樹根，將「子虛烏有」呢個四字成語講錯做「子烏虛有」，另外公民黨郭家麒亦曾「擺烏龍」將徹查事件嘅示威標語，寫咗做「撤查事件」，搞到整個意思完全相反，唔知一眾議會新丁使唔使緊急惡補吓中英文，等日後唔使再出醜呢？