政情：長毛拉布一鑊熟

政府建議長津設有資產申報制度，引起唔少有一定積蓄嘅長者不滿，但亦有更多真正有需要嘅貧困長者，希望立法會先通過長津撥款，待日後再檢討資產上限及爭取取消申報制度。有溫和泛民議員向我哋訴苦，話曾經被一位現年一百零二歲嘅長者當面痛斥，話擔心自己隨時會喺財委會拉布期間仙遊，一毫子都攞唔到，到時佢啲子子孫孫一定唔會放過佢哋喎！

情況有利 建制懶理

雖然依家只剩低長毛一人堅持拉布，但好多長者都唔會分得咁清楚，認定所有泛民都有份拉布，因此有溫和泛民近日亦向長毛痛陳利害，希望佢「高抬貴手」，避免連累全體泛民一鑊熟。不過，長毛向來獨行獨斷，連林鄭都打動唔到佢，加上最新民調顯示長毛民望急升，反映佢嘅拉布行動取得唔少市民支持，所以長毛當然唔會畀面呢班所謂「盟友」啦。

有溫和泛民為咗自保，更加「私通外敵」向建制派獻計「剪布」，方法如下：由於長毛提出嘅拉布式動議，大部分都係千篇一律，例如將長津金額「一年一檢」，分拆成「兩年一檢」、「一年兩檢」、以至「十年九檢」等，只要建制派進行「突襲」，集體投票通過其中一項動議，其餘百多項一式一樣嘅動議就會全部作廢，大大縮短表決時間。不過，建制派最後並無接納有關建議，堅持繼續嘥時間逐項否決。

溫和泛民估計，建制派亦睇到長津撥款繼續拖落去，長者只會埋怨泛民、怪政府，而唔會怪責建制派，對自己有百利而無一害，因此先至唔接納溫和泛民嘅「剪布」建議。呢場長津拉布戰最後點樣收科，真係只得長毛一個人先知！