陳伯：我下次即刻報警
【本報訊】「我下次即刻報警！唔會再帶返屋企啦！仲搵嚟衰咩！」揭發命案的陳伯堅決否認貪心及試圖「拾遺不報」，「如果要貪嘅話我就唔會坐喺度幾個鐘！一早拎咗去啦！」陳伯解釋，因不懂使用智能手機，加上落雨、手上又「一袋二袋」，所以只拿走財物，又因為有「拾金不昧」覺得報警手續繁複經驗，他強調只想拿回家交由兒子協助尋找機主認領，雖然今次無事，但總算得到教訓。
退休多年的陳伯稱，十多歲開始愛上釣魚，因現場一帶泳客常將個人物品放於岸邊，故他發現背囊及財物時，一心以為是泳客留下，從無萌發貪念。惟其後雷雨交加，他眼見背囊盡濕，自己又有背囊及釣魚工具等「一袋二袋」，又不懂用智能手機尋找機主，遂決定將手機及現款等重要財物帶回家中，交由兒子協助，「我咁多嘢仲拎個袋咩！梗係拎重要嘢啦！報警又麻煩！咪帶返去等個仔搞囉！」
「唔係偷唔係貪」
陳伯又指，父子二人揭發事件時都提心吊膽，恐受牽連，兒子稱：「人哋自殺喎！唔得喇！咁樣會死人o架，阿爸！」遂慌忙報警。由於案件涉人命，警方要向陳伯問清問楚，令陳伯自覺被當賊辦，加上因所述的背囊失蹤，警員事後要登門調查，「好似賊咁！我問心無愧呀！唔係偷唔係貪！個袋都唔知係咪水漲畀浪沖走咗啦！」他指自己亦曾拾獲錢包，詢問區議員意見後報警，但警方問長問短，令他覺得麻煩，所以不願多事。