合作社餐廳 偷雞接街客
紀律部隊宿舍中門大開，合作社餐廳公然招呼街客！規定只能向宿舍住客提供服務的合作社餐廳被發現違規對外開放，有住客不滿「街客」大增「冇啖好食」，更擔心陌生人自由進出會影響宿舍治安。立法會議員指合作社在營運上已享優待，對違規經營深表失望，促請政府部門加強監管。
「放晒啲街外客入嚟，食飯時間搞到插針都插唔入，喺度住嘅反而冇位食飯，啲街客咁易入嚟，容乜易上埋屋企？」陳先生指牛池灣豐盛街紀律部隊宿舍設有一間以合作社形式運作的餐廳，按規定只能向住戶提供服務，但餐廳卻違規對外開放，以廉價作招徠吸引附近街客，令紀律部隊宿舍頓變「冇掩雞籠」。
大門密碼鎖如同虛設
合作社餐廳位於宿舍一樓平台，記者曾多次入內用膳，均發現宿舍大門的密碼鎖如同虛設，毋須按任何密碼即可拉門直接進入，保安員更未有查問訪客身份，即指示可利用升降機前往平台餐廳。記者逗留約一小時，期間並無職員要求核實身份，反而發現餐牌上有細字列明「非會員加2元」，顯示門外張貼的「只招待本會會員」告示僅屬「虛招」，並未有切實執行。
香港公務員工會聯合會總幹事梁籌庭直言，設於各政府宿舍的合作社餐廳幾乎每間均會招呼街外客人，「雖然啲租可能平啲，但因為客源唔夠廣，好難為到皮，要做就惟有鋌而走險，其實最好就係將餐廳劃區，畀住客（會員）可以優先食嘢！」梁又指理解到宿舍會因街客眾多而產生保安問題，認為倘建議若可行，餐廳可另設入口通道予街客使用，防止外人經正門進入宿舍範圍。
「冇理由畀佢咁攞着數」
「合作社如果做街客就違反咗成個制度嘅原意，租金，牌照之類嘅成本都係由納稅人津貼，冇理由畀佢咁樣攞着數！」立法會議員王國興指合作社餐廳享有特別優待，營運成本較一般食肆為低，亦未領有食肆牌照，故不應對外開放，認為合作社餐廳如兼營街客生意，必須先循正規途徑申領食肆牌照，讓食客獲應有保障。
政府產業署發言人表示，接獲本報轉介後，已即時勸喻物業管理公司加強宿舍出入口管理，防止非住客擅自進入宿舍範圍內；同時亦已提醒合作社責成餐廳服務承辦商，確保餐廳只開放予宿舍住戶使用。倘合作社不當使用會所，該署會視乎個案的嚴重性及是否屢勸不改等因素，以決定是否終止合作社使用會所的權利。
（ireport_00031510）
記者：阮佩君