從未達標廿五年 空氣污染恨綿綿

香港空氣污染嚴重係人都知，未必人盡皆知嘅係，香港沿用二十五年嘅空氣質素指標其實非常寬鬆，同文明先進地區有天淵之別。問題係，即使標準寬鬆到冇人有，空氣質素竟然都係從來未達標，你話環保署一眾官僚係咪應該捉去打屁股吖？

呢一個咁得人驚嘅現象係審計署踢爆嘅，署方調查發現，香港空氣質素自從一九八七年以來從未完全達標。環保署○六至○七年度訂立目標，控制全年空氣污染指數不超過甚高水平嘅一百。審計報告就話嘞，呢一個目標從來都做唔到，超標日數更加由○七年嘅七十四日，上升一倍有多至去年嘅一百七十五日，即係半年以上烏煙瘴氣。

眼見負責改善空氣質素嘅環保署廢柴成咁，審計署於是建議，環境局應該按照世衞嘅指引以及海外嘅做法，定期檢討修訂空氣質素指標，亦要優先解決車輛排放廢氣問題。審計署亦認為，現時收集空氣質素數據同公布資料嘅方法未完善，十八區有近一半都冇監測站，不能提供污染指數。當局應該提供按地區劃分嘅空氣質素資料，亦要為將軍澳及屯門設立監測站。

從未達標廿五年，空氣污染恨綿綿。唉，香港人，命苦啊！

喂喂喂，空氣污染最嚴重嘅後果係擘大口食西北風都中毒，命都短幾年，環保署失職成咁簡直係草菅人命啦。萬一提早死亡瓜老襯，仲有好長手尾要跟O架，畢竟香港嘅骨灰龕位長期短缺，食衞局又搞咁耐都未搞掂，你叫死者家屬點算好呢？呼吸困難被害死仲要做遊魂野鬼，真係死得唔眼閉咯！

事實上，審計報告批評兩年後更新嘅空氣質素指標，大部分只係採納世衞中期指引，市民因呼吸系統疾病及慢性阻塞性肺病而緊急入院嘅情況將持續浮現，甚至會增加早逝風險，推算死亡率將增加百分之二點五至一成半。

大佬呀，四分一世紀流流長，如果有心做乜都做到啦，點解唔減少汽車廢氣？點解唔減少電廠排放？點解唔同偉大祖國傾傾，要求內地工廠唔好噴咁多黑煙？陸恭蕙身為環保工作者，家陣做咗環境局副局長，功夫茶有一個要求，陸副局呀陸副局，做下好心改善空氣質素吖，麻煩高抬貴手撥開雲霧見青天，閣下打爛招牌事小，市民健康受損事大。至於局長黃錦星，由海邊執膠事件已經睇得出能力有限，唔好笨手笨腳好心做壞事於願足矣！