班議員成日批評政府亂花錢賣廣告推銷政策同搞政治公關，其實佢哋參選時，亦使咗唔少錢搞政治化妝，但效果係點就因人而異喇！立法會選舉開支資料披露，過往被指形象「老土」嘅民建聯鍾樹根，用咗成十八萬元作為選舉策略顧問服務，之後再畀多四萬蚊專為應付選舉論壇補課，最終成功「升呢」，可惜當選後旋即接連爆出錯字錯成語風波，個人形象大打折扣。
當選超級議員嘅民協馮檢基同工聯會陳婉嫻，分別用咗十六萬同十萬作選舉或傳媒顧問費，馮檢基黨友譚國僑亦用咗嚟補習選舉論壇，但最後仍難逃落選嘅命運。不過講到最蝕，莫過於喺報名參選一日後即極速退選嘅骨科醫生潘德鄰，原來佢早喺四月份已經部署參選，喺六月底向公關公司繳付咗一個月大約十四萬元嘅費用。
此外，特首梁振英喺特首選舉期間聘用嘅其中一名公關，就食住成功協助梁振英當選個勢，喺九月立會選舉最少食咗兩家茶禮幫人助選，賺得超過六萬大元，不過呢兩位候選人最後都以低票落選。