中環出更：歎完靚菜郭炳聯急腳走
新鴻基地產聯席主席郭炳江及郭炳聯兩兄弟，雖然最近有麻煩嘢纏身，但係胃口一啲都唔受影響。尋日中午十二點幾，郭家兩兄弟齊齊喺旗下中環四季酒店現身，原來佢哋特登邀請英國知名嘅米芝蓮星級名廚來港，喺六樓法國餐廳Caprice炮製絕品佳餚，兩兄弟仲廣邀城中友好「賓卡」齊去分甘同味，滙豐銀行行政總裁王冬勝都有去捧場。
散席唔見炳江蹤影
據聞呢位星級名廚好出名，已有廿八年入廚經驗，呢班富豪認真識歎。大約下午兩點半鐘，一眾賓卡酒足飯飽後散席，卓妮見郭炳聯亦行色匆匆，由保鏢及酒店員工護送下急步行出門口登上座駕離去，但就未見郭炳江同王冬勝等人嘅蹤影。
