中環出更：慈善拍賣火速清倉小母牛籌得337萬
今年歐美經濟下滑，加上美國狂印銀紙導致通脹加劇，大家使錢審慎咗，唔少慈善團體都為籌款大傷腦筋。協助內地農民飼養牛羊脫貧嘅國際小母牛香港分會，前晚舉行周年慈善籌款晚宴，身為籌委會主席嘅「快勞夾大王」杜振源（Simon）、主席梁錦松同董事葉澍堃（Stephen）落力「吸水」，最終拍賣品喺半小時內火速清倉，籌得三百三十七萬多元善款。
有傳會參選全國港區人大代表嘅南旋集團主席王庭聰，都帶埋太太同大仔王槐裕夫婦捧場，去年佢娶新抱已捐咗一百二十萬元畀小母牛，今年再接再厲，割愛捐出國學大師饒宗頤墨寶《上善若水》拍賣，叫價三十萬元，反應踴躍。王庭聰見大家咁有心，應承若大家再捐三十萬元，佢會請饒老再寫張一模一樣嘅字畫，倘交唔出幅畫，佢就賠番一百二十萬元畀大家。
託賴老友幫手
Simon除咗捐三十萬元競投「上善若水」字畫外，仲一如以往捐出多支名酒拍賣，包括「布根地酒神」Henri Jayer釀製嘅兩支1978年靚紅酒，個個舉手爭住要，結果莎莎國際老闆郭少明以每支九萬九千元投得。而Stephen就捐出非洲黑檀木笑佛，最後被王庭聰以十六萬八千元帶走。對於被傳有意競逐港區人大，王庭聰承認考慮緊，同場嘅立法會議員石禮謙同梁錦松都話支持。
講到籌款，Simon同Stephen都話好擔心今年籌錢唔達標，託賴有一班老友幫手，善款數目得以維持與去年相若。Stephen話，內地貧困戶唔好話飲靚紅酒，就連見都未見過，所以大家要繼續落力支持，一定善有善報。
卓妮