喂喂喂，嚟嚟嚟，又係時候上一堂自然生物課嘞。小朋友，望望左邊吖，呢一棵係乜嘢樹呀？冇錯嘞，呢一棵係杧果樹。大家再望望右邊吖，嗰一棵又係乜嘢樹呀？噢，錯晒嘞，嗰一棵唔係杧果樹，而係多一個海字，叫做海杧果樹至啱。
嗱，小朋友記住咯喎，海杧果雖然外形好似鮮甜美味嘅杧果，之但係多咗一個海字就天差地別完全唔同晒。千祈千祈千祈，記住記住記住，海杧果唔食得，切忌亂咁放入口，原因好簡單，毒鬼死你呀！
功夫茶好耐之前已經知道常見於海邊嘅海杧果樹含有劇毒，所以次次見到都會避之則吉，行近少少都唔敢呀。勢估唔到有人居然傻到將海杧果樹種於私人屋苑，仲要係豪宅喎，莫非種樹嗰一班大帝患咗仇富情意結？
事情係咁嘅，由港鐵發展同管理嘅東涌豪宅藍天海岸第四期「水藍．天岸」，有住客發現一個驚人現象，花園內水池旁居然種咗幾棵含有劇毒嘅海杧果，多次向管理公司港鐵反映，要求移走改種其他植物。哈，港鐵罔顧住客安危遲遲冇處理，直至住客尋求傳媒協助，管理公司先至後知後覺豎起警告牌。
大家知唔知海杧果有幾毒呀？樹幹、樹枝同樹葉全株有毒，最毒係外表令人垂涎欲滴嘅果實，誤食半粒果實已經足以致命，所以有一個嚇到你鼻哥窿冇肉嘅外號叫做「含笑半粒釘」。你知啦，年少無知吖嘛，如果命運能選擇，過度活躍嘅懵懂少年都有可能選擇亂食海杧果，咁嘅命運就坎坷咯，年少無知隨時變咗年少無命。
港鐵公司唔係經營公共交通運輸咁簡單，仲係一個豬籠入水嘅大型地產商，旗下物業遍布港九新界離島不計其數，點可能亂咁種樹誤盡蒼生o架？海杧果即係毒杧果，毒杧果毒過毒蘋果，亡羊都要補牢啦，亂咁種咗毒杧果點可以只係豎起警告牌就算鬼數o架？正如港大地理系講座教授「樹木博士」詹志勇話齋，海杧果毒性強烈，外國曾經有人用作謀殺兇器，管理公司應該盡快換走以免有人受害吖嘛。
所以話啫，通識教育確係好重要，功夫茶相信港鐵相關人等嚴重缺乏常識，淨係識得利用地產霸權嘅壓倒性優勢賺盡賣樓嘅豐厚利潤，對於自然生物課通通唔識，咁先至會非常反智將劇毒樹木種於豪宅範圍之內。
萬一大吉利是講句，有人誤食含笑半粒釘而魂歸天國，港鐵賠償嘅時候記住唔好含笑呀，裝都要裝一副含恨嘅表情。內地有一個去到車禍現場居然笑騎騎放毒蛇嘅「微笑局長」，下場好慘o架，港鐵必須引以為戒。