中環出更：馬露明造人大計 等神安排
今時今日做女強人，唔可以再一味專注事業，有時要平衡吓家庭生活，好似前商務及經濟發展局局長馬時亨嘅大女馬露明（Christine），就充分體現到箇中道理。話說Christine已經結婚一段時間，但就未見佢提及生兒育女問題，日前佢出席有關糖尿病推廣活動時，卓妮就問佢會否考慮生番個小朋友玩吓，佢就好怕醜答話：「我自己都好鍾意小朋友！」聽佢咁講，唔通有聲氣？
家庭永遠放首位
不過，講到幾時造人，Christine就同佢爸爸肥亨一樣，話要等神嘅安排，而家人都冇畀壓力佢。Christine喺○九年一手創辦嘅德育學校JEMS Learning House，至今辦得相當出色，學生人數不斷上升。愛心爆棚嘅佢話，學校賺唔賺錢都係其次，最開心係見到班小朋友學乖；但講到事業同家庭之間嘅比重，佢就話永遠都會將家庭放在首位，果然係事業與家庭並重喎。