探射燈：食署告票橫飛排檔生計難保

以前罰二百 依家罰五千

年屆七十歲的楊太，於灣仔太原街經營排檔逾十五年，早前接獲票控，指她收檔後放置於排檔的貨物超出規定範圍。「我收咗工，咩都放番好，都唔知佢哋點度，我仲以為罰好少錢，幾年前被罰過兩次，每次個官都係判罰二、三百蚊，今次諗住都係罰幾百蚊，咪喺法庭上認罪囉，官無話罰幾多錢及原因，我離開法庭取罰款通知書至知被罰五千蚊！」

「我一年都只係交幾千蚊租，被罰五千蚊，真係好多錢，如果再被票控，以後日子點算？生活都成問題！」楊太自知有阻街，但希望食環署公開計算方法，即她的排檔超出規定的具體數據，令她心服口服。她強調，自從去年旺角花園街四級火後，已經遵照署方要求，多次於排檔位置進行改建或加裝防火物料，盡量配合，但仍收到告票，感到非常無奈。

全港共有四十三個小販排檔區，灣仔交加街排檔是其中之一。

在灣仔交加街擺檔多年的童先生，三個月內被票控六次。

取締越位擺賣 日日影相

「以前食環署執法冇咁嚴，但呢幾個月幾乎日日嚟影相、查牌，搞到啲客都唔敢行埋嚟買嘢！」另一在灣仔交加街排檔擺賣乾貨的童先生無奈說：「我又唔係做賊，只係賣嘢做生意啫，點解會被針對？」

小販停牌制度剛於本月一日實施，違例會被勒令停牌七至三十日。	市民點睇 唐小姐（待業）：「新停牌制度嚴咗少少，檔主都係搵兩餐，停牌會影響佢哋生計，應酌情處理。」	李小姐（大專生）：「三乘四呎呢個面積規定有啲過時，政府可檢討，睇吓係咪可以放寬。」

童於過去三個月共收到六張告票，全部都是被控擺放的貨物超出範圍，罰款由二千多元至三千多元，累計被罰逾一萬八千元。記者採訪期間，他又剛接獲第七張告票，同樣被控貨品超出排檔範圍。

手停口停 一家八口點生活

「上次已經罰咗三千幾蚊，今次又唔知罰幾多錢，賺埋都唔夠交罰款！」面對已實施的小販停牌制度，童顯得憂心忡忡，擔心隨時被勒令停牌最少七日。「如果被停牌，手停口停，一家八口都唔知點樣生活！」

事件亦惹起全港排檔檔主關注，香港五行小商販福利會會長盧德輝表示，很多檔主都很自律，以不阻礙街道的情況下做生意，希望當局體恤檔主苦況。

他認為，現時排檔面積規定是上世紀五十年代訂立，已不合時宜，促當局配合現時需要，檢討排檔的面積。立法會議員王國興亦批評食環署執法過嚴，會影響檔主生計，應與檔主商討，尋找雙贏方案。

食環署發言人表示，會不定時巡查本港不同固定攤位小販區，對違規者採取執法行動。過去三年，就固定攤位小販觸犯阻街罪行，共提出一萬一千七百五十八宗檢控，當中灣仔交加街有兩百九十二宗。

文/圖：專案組