特首梁振英（CY）今日會出席新一屆立法會首次答問大會，各黨派都磨拳擦掌準備提問，據聞一般問題都係有關勞工及福利範疇，例如長者生活津貼嘅生效追溯期，或者係追問幾時立法制訂標準工時，以及要求改善強積金行政費過高等問題。不過，社民連梁國雄（長毛）就最識搶鏡，尋日揚言到時會「淋糞」喎，嘩，唔通長毛玩到冇嘢好玩？
其實喺長毛口中所講嘅「淋糞」，其實只係淋人造糞便，取諧音「淋糞」（林奮），諷刺行政會議成員林奮強涉嫌偷步賣樓事件，話希望CY關注事件喎。據聞長毛近日喺會議上出盡道具法寶引人注意，但都冇乜人理會佢，唔通佢因此而要出動到人造糞便？
功能界別方面，建築、測量及都市規劃界謝偉銓就話，政府之前講過會考慮將工廠改建住宅增加房屋供應，佢會喺大會上問吓依家進展成點。紡織及製衣界鍾國斌就話香港多年來喺六大產業發展上乜都無做過，佢要問CY點解決產業單一化嘅問題。