政情：大舞台：張建宗 林煥光 為長津一唱一和

長者生活津貼計劃喺泛民主派同工聯會議員聯手下，未能喺前日嘅立法會財務委員會上討論及通過，令四十萬長者隨時少收一個月津貼，如果再拖嘅話真係凍過水。勞工及福利局局長張建宗尋日出席一個觀星活動時呻話，營地風和日麗，但喺立法會就只能望天打卦，佢希望天公作美，等班長者盡快攞到新津貼。行政會議召集人林煥光尋日亦出嚟做正義朋友，希望張建宗唔好怕咗啲黑暗勢力，要努力爭取計劃盡快通過，擺明係暗批拖延撥款嘅黨派係黑暗勢力。