政情：舊生感恩 300萬支票捐鮮魚行
專門取錄窮孩子嘅鮮魚行學校，校長同學生一齊參演一輯醫藥廣告後，唔單止令學校人氣急升，仲帶挈學校收到巨額捐款。鮮魚行學校校長梁紀昌透露，尋日有個於一九八三年喺鮮魚行學校上午校畢業嘅校友，睇完個廣告覺得感動，故返母校捐咗一張三百萬元嘅支票，感謝學校多年前悉心栽培，校友話今日會再返學校捐多二百萬元。
梁校長話，呢位校友善長為人低調，唔想公開身份，只透露呢位校友自小喺屋企無人理，全靠學校老師悉心教導，至小六突然開竅，升中派位仲順利獲派往名校伊利沙伯中學。完成學業後，子承父業喺魚欄工作，仲將盤生意企業化經營，搞得相當成功。
鮮魚行學校接拍呢輯廣告，唔單止收一萬元由廣告公司捐出嘅款項，擔當廣告主角「校長爸爸」嘅梁紀昌亦收咗六位數字金額嘅演員費，校長就將呢筆演員費全數捐晒畀學校。唔單止咁，每個有份拍廣告嘅學生都收到三百元出鏡費，仲獲邀請免費去海洋公園哈囉喂、去酒店食自助餐，仲有月餅送添，推銷學校之餘仲有得玩、有得食，待遇確係唔錯喎。