政情：林D9牛津演講唱好香港
任期屆滿後急流勇退、寧選擇放洋去英國牛津大學讀神學嘅前政務司司長林瑞麟（林D9），日前應邀喺牛津大學發表演說。今次演說特別之處，在於林D9「退休」後首次出席嘅公開場合，演詞內容一如既往，大力唱好香港，堅持《基本法》及一國兩制喺香港成功落實，據聞出席活動嘅中外人士大都聽到點晒頭。林D9去到外國依然心繫家國，唔通博返香港後有機會更上層樓？或染指全國政協常委一職？
林D9為官之時，最為外人稱道之處，係佢面皮夠厚，兼且記憶力強，可以將所有標準答案背到滾瓜爛熟。有出席演講嘅在場人士話，呢場三十分鐘嘅表演絕無冷場，雖然林D9手執「貓紙」，但期間幾乎冇偷睇過，並以流利英語暢順發言，在場人士無不讚嘆。
談中央回應港人普選訴求
據聞，成篇演說用咗好大篇幅介紹香港政制發展，話九七之前，海外傳媒都唔睇好香港回歸後嘅前途，結果香港成功平穩過渡，中央政府亦履行《中英聯合聲明》中嘅規定，令香港人賴以自豪嘅司法制度，以及市民各項人權自由得以保留。林D9亦話，香港未全面普選，皆因港英殖民地政府太遲推直選，就算係《中英聯合聲明》亦冇提到普選，反而係中央政府回應港人訴求，先會將普選加入《基本法》。
林D9又話，特區政府喺擴大選民基礎方面做咗好多工作，包括一○年政改方案，新增「超級區議會」議席， 令全港市民都一人有兩票，選民人數比末代港督彭定康九五年嘅「新九組」方案仲要多。唔單只咁，林D9喺演詞中仲暗批肥彭，話肥彭九二年上任後曾訪問加拿大，林D9話自己當時正擔任香港駐多倫多經濟貿易辦事處處長，佢話肥彭聲言支持香港民主化，係博取當地政客及媒體歡迎。
盛傳有機會做政協常委？
演詞中亦提及香港法治同經濟發展，據講好多觀眾都聽到點晒頭，唱好香港嘅目的已經達到。林D9讀神學都不忘交心，話佢唔係為將來仕途鋪路都冇人信。政界一直盛傳佢明年三月有機會做政協常委，今次佢在外唱好香港，唔知會否成功加分呢？