政情：嗌「謝議員」謝偉銓唔識應
兩名新任立法會議員民建聯梁志祥（祥哥）同建築、測量及都市規劃界嘅謝偉銓（Tony），尋日出席一個電台節目同一班年輕人對話。被問到成功當選已有成個月，聽唔聽得慣「議員」呢個稱呼。做咗廿幾年元朗區區議員，○八年起仲升埋呢做咗區議會主席嘅梁志祥，就梗係聽到慣晒啦。
不過剛成為立會新丁嘅Tony，就直言仲未習慣，因為以往業界朋友一般都叫佢做Tony，其他人就叫佢做「謝生」。加上今屆立法會內仲有一位同樣姓謝，而且個樣同Tony有七分似嘅獨立建制派議員謝偉俊（阿Paul），因此每當佢聽到有人大嗌「謝議員」，佢都要先停一停、諗一諗，確保自己同對方都無認錯人同嗌錯名後，佢至夠膽應。
講開呢兩位謝議員，Tony早前再次澄清同阿Paul無任何血緣關係，但佢的確有位兄弟做律師，個名亦係以「謝偉」開頭，因此以前喺建築界同法律界，都不時有人搞錯，以為佢同阿Paul係親兄弟。佢話為免再生誤會，大家都係叫佢做Tony好喇！