唔少政黨同團體要求俗稱「特惠生果金」嘅長者生活津貼，申請長者完全毋須申報個人資產同入息，但反對者就認為咁做等於變相派錢，唔符合將有限資源用於有需要人士嘅原則。負責睇住政府盤數嘅財政司司長曾俊華，尋日臨離開香港外訪時，就開腔力撐申報機制，強調特惠生果金係扶貧而非還富於民措施。當年曾俊華喺多個政黨「轉軚」施壓下，被迫違背審慎理財原則向全民派發六千蚊，唔知今次會唔會歷史重演呢？
