政情：「最短命局長」麥齊光現身
因為涉嫌呃取政府租金津貼，成為本港史上局長任期最短嘅前發展局局長麥齊光，尋日喺水貨客集中地港鐵上水站蒲頭，仲拎住袋嘢，佢潛水咁耐，唔通轉行走水貨？當然唔係啦，麥齊光同行有個嚟自英國嘅工程師，佢話帶老外工程師周圍睇吓香港有咩工程，但究竟係私人定政府工程就唔講嘞。
尋日晏晝，麥齊光喺港鐵上水站C出口穿插於一眾水貨客之中，記者上前影相，佢即刻煞有介事話「做乜影我相！」仲爆咗句「我係返香港o架！」唔知係咪驚被懷疑佢走水貨入內地。
當記者道明身份時，佢先展露笑容話「有咩好影吖」。同行除了老外，仲有一名中國人，麥齊光話帶老外去睇吓香港有咩工程，兩人仲拎住一模一樣嘅環保袋。麥齊光又話自己依家生活好好，得閒會做義工，但對於佢單涉嫌呃取政府租金津貼案件，就一概唔回應。另外，以前坐慣AM車嘅麥齊光，出入有司機，可能搭唔慣港鐵，期間佢問記者點樣去番往紅磡方向嘅月台。