新一屆立法會七十名議員今日十一點開始進行宣誓，回顧過往兩屆，都有激進泛民議員透過喺誓詞上「加料」，或者宣誓時整色整水博出位，今屆亦唔例外。其中新民主同盟范國威預告，會喺原有誓詞後面加上「民生無小事、民主要堅持」等口號。人民力量「慢必」陳志全除咗「加料」宣誓外，仲會故意以「大細聲」宣誓，等人聽唔清楚佢唔想讀嘅字眼。
上屆宣誓時都有加鹽加醋嘅工黨李卓人，今屆會改用英文宣誓，原因係唔想用中文讀出「擁護《基本法》」、「擁護中華人民共和國」等「肉麻」字眼喎，其實佢都唔係第一次宣誓啦，佢又會同其餘三位工黨議員張國柱、張超雄同何秀蘭，學學民思潮成員咁，着住印有「我愛香港」嘅黑色T恤宣誓。
宣誓之後，下晝仲有「節目」，就係選出內務委員會同財務委員會嘅正、副主席，其中建制同泛民就財委會傾唔掂數，正副主席真正要投票選出。