政情：嫻姐放手畀新丁發揮
新一屆立法會今早舉行首次會議，各黨派亦選咗佢哋嘅黨團召集人。喺工聯會入面，呼聲最高嘅當然係超級議員陳婉嫻啦！不過，聞說大家都好尊重嘅嫻姐雖然夠晒強，但出咗名長氣，所以佢哋前屆立法會團隊每次開會，都要用上頗長嘅時間，上屆嫻姐唔喺立法會，工聯會黨團開會時間的確少咗好多，所以難免令人擔心嫻姐重返議會後，冗長會議又返嚟。
工聯會尋日舉行記者會，介紹佢哋未來四年嘅十大工作目標，不出所料，黨團召集人正正係嫻姐。不過，嫻姐似乎真係想放手畀新丁自由發揮喎。佢唔單止好忍得口畀三個新丁輪流講工作目標，當新界西議員麥美娟提到啲嫻姐亦非常關注嘅政策時，嫻姐都話唔使點補充喇。嫻姐仲話，新丁至係佢哋嘅核心，未來議會要以老帶新。
人係要與時並進嘅，明白新丁做核心嘅重要，咁嘅團隊自然朝氣勃勃喇。