政情：新民黨變官場快線
前保安局局長葉劉淑儀帶領嘅新民黨成立以來不時招攬啲高學歷、外國名牌大學畢業嘅後生仔加入，係一個尖子黨，但就因為咁，黨員好易成為被外間招攬嘅對象，之前發生過葉太一手提攜嘅前南區區議員陳岳鵬進身官場事件，有消息指，葉太愛徒、「會考十優狀元」施俊輝（Jeff）有望做翻版陳岳鵬，過檔政府做教育局局長政治助理，倘若屬實，新民黨將再次成為進身官場嘅踏腳石，唔知葉太對黨員再三「借殼上市」會否百般感受在心頭？
本報日前獨家報道，有傳環境局已搵到合適嘅政治助理人選，呢個就係被公認係靚女嘅地球之友副環境事務經理區詠芷，據聞最新流傳進身官場嘅名字，就係名牌大學史丹福畢業、現年廿六歲嘅Jeff。消息話，曾經喺學校教書嘅Jeff，今年六月靜雞雞申請做政助，直到上月底佢先同所屬政黨交代，保密工夫認真做到一流。
施俊輝認確有申請
原本新民黨有成員有望做官係可喜嘅事，不過據聞Jeff呢次申請做官並非葉太推薦，更有傳葉太喺剛過去嘅立法會選舉前事不計，搵番陳岳鵬到南區幫手，或多或少同扎根喺海怡半島嘅Jeff拉票表現一般有關喎。Jeff接受查詢時話不願評論入官場傳聞，但承認今年五月曾申請教育局政助，倘有機會做到，相信佢以往教書嘅經驗會幫到未來工作喎！
事實上，葉太領導嘅政團已非首次有成員入官場，首先匯賢智庫嘅陳岳鵬喺一○年做緊南區區議員時，突然畀政府挖角去做特首辦特別助理，要辭去區議員職務，搞到之後補選輸咗，據聞當時內部對此都有微言，三令五申做議員就要做足四年，殊不知事隔兩年後，再有Jeff失驚無神上位在望，事前可謂一啲風聲都無，搞到匯賢智庫同新民黨好似提供「旋轉門」嘅場所，相信非一心壯大所屬政黨發展嘅葉太所願。究竟葉太日後點樣先可以防止黨內政治新星「有出無入」？相信佢都幾頭痛。