中環出更：周恩來姪女讚港勝北京
明年係已故國家總理周恩來誕辰一百一十五周年，香港浸會大學搞咗個「魅力‧智慧——美國人眼中的周恩來」圖片展覽。周恩來嘅姪女周秉德尋日仲特登嚟到香港出席圖片展嘅開幕禮添。周秉德已經嚟過香港好多次，問佢對香港印象點啦，佢就話香港愈嚟愈繁華，城市管理做得好好，「堵車比北京好多了！」佢仲話喺北京一遇到塞車就怕怕。
周秉德尋日嚟香港出席圖片展嘅開幕禮，佢話周恩來其實都嚟過香港不下十次，不過都係建國前嚟得比較多，而佢自己都嚟過香港好多次o架喇。一提起周恩來，周秉德就話︰「他第一個字就是忙，忙着國家大事。」
國民教育議題喺香港搞到鬧哄哄，又畀人話係「洗腦」。周秉德就話「沒甚麼洗不洗腦，所有媒體都在為大家洗腦，太普遍了。」佢又話好多事傳媒「炒起」時大家自然會關注多啲，冇咩大不了喎。