中環出更：陳淑莊歎紅酒無拘無束
失落咗立法會議席嘅前議員陳淑莊（Tanya），她放下拘束，生活得自由奔放。做議員時要規行矩步嘅禁忌，都已一一打破。卓妮前晚撞見佢喺金鐘太古廣場嘅意大利餐廳Grappa's Ristorante勁飲紅酒，興之所至，仲即時走落超市買多一支紅酒「加料」，睇嚟酒量不淺。
唔做議員後，Tanya不愁寂寞，除咗喺電台開咪，仲不時約老友食飯。前晚七點，素顏打扮嘅佢，相約一男一女好友喺Grappa's食晚餐，見Tanya頻頻同友人碰杯豪飲，心情似乎未受政途暗淡影響。
未逢第二春 謀重操故業
坐低半粒鐘後，佢同女性友人起身離席，原來係行落商場樓下嘅超市Shopping。兩人先睇凍肉，再揀紅酒，話咁快掃咗一支心水佳釀。無帶環保袋嘅Tanya，索性拎住支酒步回餐廳再飲過，表現豪邁。三人你一杯，我一杯，飲到夜晚九點鐘先走。離開時，男性友人親自護花，莫非係新男友？
致電Tanya查詢，佢o格o格大笑話：「拍拖都唔會喺咁公開嘅地方喇，係普通朋友嚟咋。」外間曾盛傳Tanya因為事業心太重，令前男友受不了分手。如今回復自由身，幾時再覓第二春？「中女」Tanya就慨嘆緣分未到，唔會急急搵男人拍拖。佢又笑言依家每朝五點起身準備開咪，化妝打扮都無時間。
一眾新一屆立法會議員今日宣誓就職，不過無Tanya份。但硬朗嘅佢已為自己鋪定後路，正計劃喺報紙、雜誌寫專欄，又考慮重操故業做律師，聽落分分鐘精彩過做議員噃。
卓妮