探射燈：警濫告洗黑錢 苦主名利雙失
打擊跨境洗黑錢活動是國際反恐的大趨勢，而俗稱「洗黑錢」罪的《有組織及嚴重罪行條例》，近年更成為警方及海關打擊犯罪集團財政的「必殺例」，以凍結疑犯財產的手段冰封不法集團的所有運作。但這把打擊不法集團的利刃，近年卻被質疑遭到濫用，有執法人員動輒運用該例賦予的權力凍結疑犯財產，由於調查經年，不少被「濫告」的受害人，即使其後查無洗黑錢實據，獲解凍財產，但生意、商譽已被重創，難以東山再起。
文／圖：專案組
今年三月，區域法庭審訊一宗偽造商標貨品案中，海關就引用「洗黑錢」罪起訴柏鴻國際貿易有限公司董事許志群，最終許被控「洗黑錢」罪不成立，而許在求情時表示，案發後因一千五百萬元資產遭凍結，其經營的店舖由十四間大減為六間，出糧予員工亦有困難。他日前接受本報的訪問時亦訴苦，指在資產凍結期間，生意大受影響。
箍實疑犯兩年後才起訴
其實，類似的案例比比皆是，法律界人士直言，執法部門現時在執行「洗黑錢」罪時，實有濫用之嫌。律師黃國桐憶述，其一名客戶，早年亦同受涉嫌洗黑錢之罪名所害。事發於三年前，苦主是一間公司的東主，因公司戶口有一筆逾千萬元的轉帳，但該筆款項卻被警方懷疑有問題，以涉嫌洗黑錢罪名凍結其戶口，惟約一年半後，警方最後因證據不足，戶口才獲解凍，苦主的生意因資金周轉出現問題而大受打擊。
「警方某程度上都係有濫用條『洗黑錢』罪o架，佢哋（執法人員）根本冇考慮到被指涉及洗黑錢嘅人會受到幾大的傷害，所以應該盡力去查清楚，有足夠證據先檢控，但依家佢哋卻傾向用呢條例勾住咗你，然後先去慢慢查。」黃國桐表示，近年他接獲客戶被警方指控涉及洗黑錢的案件倍增，涉案的客戶戶口往往被凍結最少半年至八個月，亦有個案在凍結資產兩年後才被起訴，當中不少更屬「亂咁勾」，即最初「就話懷疑你洗黑錢所以查你，但其實根本唔夠料」，之後真正「落鑊」則轉控其他罪行，例如虛假文書等。
難證惡意檢控追討損失
「最初話你涉嫌洗黑錢， 之後又話唔係，咁樣除咗會影響事主的業務，更嚴重嘅係連商譽、名譽都影響埋。」黃國桐又指，雖然事主之後可循民事訴訟追討損失，但要指控警方當初欠足夠證據而檢控，要在法律上證明當中涉及好大意或疏忽，和屬於帶有惡意的檢控，其實好難，所以事主多不會考慮追討。
有前線執法人員更踢爆，「洗黑錢」罪在上世紀九十年代實施，近年廣為他們所採用。他直指，「未有呢條罪前，我哋要整啲黑社會便會告佢哋『油雞』（遊街），但要搞佢哋啲錢，就要搵稅局查佢哋有冇漏稅，先可以睇到佢哋『盤數』，但罰極都只不過係『一千幾百』，啲老黑點會驚你差人喎；依家有咗條『洗黑錢』罪，梗係會用條例勾住啲犯先啦，凍晒佢哋啲錢，現金、屋、珠寶、古董，連保險都可以凍埋，告唔告得入都拖到一、兩年，等佢哋期間完全做唔到嘢、運作唔到，然後先慢慢查，再用啲夠料入嘅罪嚟落佢鑊，條例咁好用，唔用就笨啦。」