政情：袋巾傑自暴其短
立法會聽日就會開會選出新一屆嘅主席，尋日就率先搞咗場非正式嘅選舉論壇，由兩位候選人，包括競逐連任嘅民建聯曾鈺成，同埋公民黨黨魁梁家傑（袋巾傑）坐定定畀一眾議員質詢。雙方陣營壁壘分明，泛民主派集中攻擊曾鈺成上屆會期尾時「剪布」嘅決定，建制派就不斷質疑袋巾傑一旦當選，會唔處理「拉布」問題，任由激進泛民癱瘓議會。袋巾傑開場發言時強調自己「兩寬三嚴」對待議員，即時畀曾鈺成反駁話咁樣即係認同主席喺灰色地帶可用酌情權，呢種講法其實即係唔跟議事規則去做喎。
尋日嘅論壇足足講咗兩個小時，袋巾傑開場時就強調，會用「兩寬」嘅方式去主持會議，意思係從寬處理議會內嘅發言，及寬鬆審批法案、修正案同動議辯論。佢同時又承諾，會以「三嚴」原則去做主席，包括約束主席權力，議事規則冇寫明嘅權力，佢就唔運用；會嚴肅捍衞議會尊嚴，同埋嚴厲要求政府全面直接回應議員提問。
雖有非議 曾鈺成勢連任
聽落好似好有道理咁，不過一向才思敏捷嘅曾鈺成當然唔會放過對手，佢取笑袋巾傑話，對方咁講好危險，代表袋巾傑認同可用灰色地帶調節鬆緊度，佢強調，自己處理任何立法會事務，都只會係跟足規矩去做，除非修改議事規則，否則佢依舊會好似上屆會期尾咁，批准議員提出過千條修正案。
不過唔好以為曾鈺成好英明神武喎，其實唔少建制派盟友都批評佢處理激進泛民主派議員嘅會內行為過度寬鬆，仲有人質疑佢唔應該批准咁多無聊瑣碎修正案，認為佢係癱瘓議會幫兇咁話。曾鈺成事後亦話，今次未必可以得到所有建制派議員嘅支持，但就幸好未有建制派議員講明唔支持佢喎。
此外，曾鈺成在論壇上亦再次被問到係唔係共產黨員，首先提出呢個問題嘅竟然係廠商會議員林大輝。曾鈺成就話，特首梁振英亦答過自己唔係共產黨員，但外界一樣質疑佢，為咗唔想跌入語言陷阱，呢個問題都係唔會再答喎。尋日嘅辯論還曾鈺成言論自由，不過佢連任主席已經成為定局，佢聽日當選後，又會失去言論自由喇。