政情：徐立之冇晒計仔要快閃？

徐立之喺去年「八一八」港大百周年慶典風波之後，對外宣布將於同年年底離任，但因為校方一直未物色到理想接班人，令徐立之延長任期至今。佢話做港大校長之前，本來都冇打算過嚟香港打工，依家喺香江逗留咗咁耐，實屬意料之外。

至於退咗休之後會否繼續留港，佢就話未有計劃。問佢之後會否擔任其他工作或公職？佢話心中有個數，如果退休後六個月內都冇人邀請佢做嘢，咁就唔使再諗咁多，專心享受人生喎。