新一屆立法會即將開始運作，各個委員會正、副主席都係泛民主派同建制派嘅必爭之地。不過，泛民各黨派本身都未有共識，淨係內務委員會都有三個泛民議員角逐，就連泛民自己嘅「飯盒會」召集人都要打崩頭爭住做，改為各泛民黨派輪莊，睇嚟四分五裂嘅泛民日後喺政策議題上更加難尋求一致共識。
泛民一直定期召開嘅「飯盒會」，原本一直都由工黨何秀蘭（Cyd）做召集人，但尋日開會後就有個新安排，改為公文袋、白鴿黨、工黨、街工及泛民獨立議員分成四組，每組人選各做一年。
「飯盒會」尋日亦討論推舉人選同建制派角逐立會同其他委員會嘅正副主席，但除咗決定派出公文袋梁家傑角逐立會主席外，其他委員會都未有共識。新民主同盟范國威就話，佢同Cyd都有意思做環境事務委員會，要喺明日嘅「飯盒會」再討論。
估唔到泛民為咗呢啲雞毛蒜皮嘅嘢花咁多時間去討論，反而討論長者生活津貼議題就未有共識，佢哋有幾關注民生，相信市民睇得一清二楚。