政情：白鴿黨阻新議員布置辦公室
立法會大執漏工程已經完工，靜待一眾新議員下周投入工作。雖然秘書處準時交貨，但竟然仲有個別議員賴死唔走阻住新議員入伙，到底係邊個咁唔守規矩？咪就係民主黨（白鴿黨）涂謹申同甘乃威囉！阿涂同甘乃威呢兩個「遲搬一族」至尋日都未執乾淨舊議員辦公室啲雜物，搞到公共專業聯盟兩位新議員同教協葉建源唔可以布置新辦公室。
聯盟成員之一嘅資訊科技界議員莫乃光話，尋日去睇過白鴿黨搬屋情況，阿涂仲有小部分雜物尚未清理，而隔籬房嘅張文光已經一早清理晒成間辦公室等佢哋進駐，即係張文光無辜被阿涂累。葉建源就話，白鴿黨承諾周末前騰出甘乃威原有間房畀佢，又話反正新辦公室未請夠人，遲多一至兩日入伙都冇所謂喎。
李國寶疑賴死唔走
另外，旅遊界議員姚思榮原本會取代前金融界議員李國寶成為七樓最尾嗰間辦公室嘅新主人，但佢尋日話至今仲未可以搬入去，一度惹來李國寶賴死唔走嘅疑雲。不過，秘書處回覆話，李國寶上月底已經搬走，但由於秘書處要進行後期清潔工作，所以令姚思榮等耐咗喎。