中環出更：郭少明想抱孫仔拉頭馬
每年十月中，沙田馬場都會舉行婦女銀袋日，一眾名媛淑女聚首綠茵場上爭妍鬥麗，呢項盛會將於本月十四日再次上演。為咗令盛會更加有聲有色，莎莎國際主席郭少明除咗搵到內地紅星擔任形象大使外，仲會喺場內設立化妝專櫃教人扮靚靚，同埋交由公眾投票選出妝扮最佳嘅女士。為咗皆大歡喜，郭少明話獎項不限於頭三名，其餘進身決賽嘅女士都有安慰獎，總之務求大家都開心。
婦女銀袋日 出三匹馬參賽
對於太太郭羅桂珍當日嘅盛裝，郭少明就話毫不知情，因為太太要保持神秘感直到當日才揭曉。郭家千金郭詩慧（Melody）就因為忙於產後瘦身，當日嘅衣着尚處於物色階段。
當日郭家會出動三匹愛駒參賽，而Melody更會帶埋六個月大嘅囝囝陳頌言出席，佢話爸爸期望可以手抱孫仔拉頭馬喎。郭少明滿懷自信話呢個機會一定有，因為孫兒出生第三日已經有馬匹勝出，但當時孫仔太細，未適宜落場拉頭馬。