中環出更：黃錦成地獄式訓練愛女
扎根香港六十周年嘅九龍表行，尋日喺尖沙咀一個商場舉行展覽，錶行董事總經理黃錦成親自招呼同業來賓，開心到好似自己擺大壽咁，佢仲着番四十年前嘅結婚禮服，至今依然fit到漏，證明身形四十年不變喎。黃錦成愛女黃雅芝（Angie）同堂弟黃家恒（Kevin）都有去幫手，期間Angie仲大爆爸爸當年對佢嘅「地獄式訓練」添。
自十三歲就赴美留學嘅Angie話，佢每年暑假都會回港做暑期工，當年爸爸為咗鍛煉佢嘅耐力，就要佢每日開工十二個鐘，只准企唔准坐，兼只有半個鐘食飯時間，人工更比其他員工少。Angie好聽話跟到足，仲明白到搵食係幾咁艱難，自此努力發奮，幫爸爸打理好盤生意，讀完經濟學學位後，到上海工作三年返港，依家主要負責鐘錶出口銷售。Angie睇好中東市場，佢話當地人鍾意金碧輝煌嘅鐘錶，試過有客人要求全隻錶錶面鑲滿寶石同水晶，公司就會為客人度身訂造，務求盡善盡美。
寄語遇困難 勿退縮放棄
黃錦成話，希望年輕人遇到危機同困難時，唔好退縮放棄，要轉危為機。好似佢早前發現好多年輕人都唔戴錶，因智能手機已有時間功能。不過佢對呢個「敵人」冇有怕，仲研發咗新產品吸引後生仔，但產品係乜，佢就要賣個關子喇。今年只有二十五歲嘅Kevin，喺紐約大學修讀政治學畢業後，返錶行做咗近一年，依家負責市場拓展。佢透露公司正致力開設新店，貨品則以中價為主，大約四千至二萬港元嘅鐘錶最受歡迎。
卓妮