生還者質疑船長無常識
【本報訊】「撞咗船立刻兩架船分開，梗係會令撞爛個位置損毀更加大，稍有常識嘅人都知啦，無理由個船長會唔知！」據生還者劉鑑波憶述，當晚兩船相撞後原本緊靠在一起，不明白肇事的「海泰號」雙體船為何貿貿然倒後駛離，令「南丫IV」船尾的「大窿」迅速入水及下沉，釀成慘劇。
經歷生死一刻的劉鑑波昨透露，兩船相撞後，原本緊靠在一起，船身雖然穿窿，但因被「海泰號」阻隔，海水只是慢慢湧入船艙，但「海泰號」突然自行倒後，「夾硬」分開兩船，他質疑：「係人都知，車胎被釘刺爆後，如果無即時拔出，車胎慢慢洩氣，仍可支持一段距離，但一拔出釘，會即時洩漏所有氣，咁架車多行一步都唔得啦！」
可承托被撞船 減慢入水速度
劉續稱，撞船不可即刻分開好處屬同一道理，因為船身雖然穿窿，但被另一隻船的船身塞住，減慢了入水速度。就算船隻下沉，也會被緊貼的船承托住，減慢下沉速度，因此，如果強行拉開兩艘船，只會加大損毀程度，做法實在相當危險。他不諱言：「我真係唔明白個船長點解會唔理我哋架船沉，就咁貿貿然倒後，令到架船好快咁入水沉落去！」又認為今次嚴重海難，「海泰號」船長可能要負上一定的責任。
