政情：張炳良日日「焗桑拿」

新政府還未開展前，好多人已預期呢個熱廚房唔係個個肯入，但有啲人就鍾意向難度挑戰，廚房愈熱，就愈會想行入去體會吓。不過，始終每個人對熱力嘅感覺都唔同，忍耐能力亦唔一樣。好似張炳良就有更深刻嘅體會，事關港人心繫房屋問題，淨係復建居屋、高樓價同新界東北發展問題，已經搞到佢周身唔得閒。

張炳良尋日出席一公開活動時坦言，政府唔單止係熱廚房，直頭係桑拿房，自己入咗去幾個月，足足瘦咗成個圈。佢話因為自己係公眾人物，又成日要喺外面食飯應酬，所以好緊張自己嘅體重，每朝起身都會上吓磅，睇吓有冇重到。自從佢做咗局長之後，幾個月來最多瘦咗八磅，直到近期先叫做見底回升，肥番兩磅咁大把。

除咗房屋 諗埋優化交通

雖然政府呢個桑拿房熱得驚人，但張炳良話冇有怕，因為佢唔單止要搞好本港嘅房屋問題，運輸方面都會積極處理。佢仲話，未來幾年會優化本地鐵路同巴士路線，因為好多人都希望有多啲鐵路，但同時又要考慮增建鐵路會唔會影響其他交通工具，以及引發其他環境問題，所以真係好多嘢要諗。張局長咁多嘢忙，睇怕想肥都幾難囉！

其實能否適應熱廚房或桑拿房，都好睇官員本身係咪識得釋放壓力，好似公務員事務局局長鄧國威就講過，做局長壓力係大咗啲，但認為最緊要係自己識得放鬆喎。又或者好似前保安局局長李少光咁，在任時經常約埋三五知己去打吓高爾夫球輕鬆吓；甚至好似前高官葉澍堃咁周圍去食好嘢，都係唔錯嘅選擇。